اسلام آباد ۔ 24 دسمبر (اے پی پی)اسلام آباد دی احتساب عدالت دے جج محمد ارشد ملک نیب ولوں دائر کیتے کیتے گئے العزیزیہ ریفرنس اچ جرم ثابت تھیونڑ تے ملزم سابق وزیر اعظم نوازشریف کوں 7 سال قیدبامشقت وجرمانہ دی سزاسنڑائی اے جڈاں جو انہاں کوں عدم ثبوت دی بنیاد تے فلیگ شپ ریفرنس اچ بری کر ڈتے،عدالت ملزم کوں العزیزیہ ریفرنس اچ 7 سال قید با مشقت‘ 1.5ارب اتے 2.5ملین ڈالر جرمانہ دی سزاسنڑائی اے،العزیزیہ اتے ہل میٹل جائیدادضبطی دا وی حکم ڈیندے ہوئے ڈاہ سال کیتے عوامی عہدے کیتے نااہل قرارڈتے،فیصلے توں بعدنیب حکام نوازشریف کوں کمرہ عدالت توں گرفتار کر گھدے، عدالت نوازشریف دے پتراں حسن و حسین کوں مفرور قرارڈیندے ہوئے انہاں دے دائمی وارنٹ جاری کرڈتن۔عدالت فیصلے اچ آکھیے جو فلیگ شپ ریفرنس اچ کیس نئیں بنڑدا تہوں محمدنواز شریف کوں بری کیتا ویندے، جڈاں جو العزیزیہ ریفرنس اچ بہوں واضح ثبوت ہین اتے نواز شریف منی ٹریل نئیں ڈے سگیے۔ ایں موقع تے فیصلے ویلھے سابق وزیر اعظم محمد نواز شریف وی عدالت اچ موجود ہن جتھاں نیب حکام محمد نواز شریف کوں حراست اچ گھن گھدے۔محمد نواز شریف کوں العزیزیہ سٹیل مل ریفرنس نمبر19 اچ نیب آرڈیننس 1999دی سیکشن 19(5) دی سب سیکشن 5دے تحت7سال قیدجڈاں جو 2کروڑ50لکھ ڈالراتے ڈیڈھ ارب روپے جرمانہ دے علاوہ10سال کیتے کہیں وی سرکاری عہدے یا عوامی عہدہ اتے بنک قرض گھنڑ تے پابندی دی سزاڈتی۔العزیزیہ ریفرنس اچ ہل میٹل کمپنی بحق سرکارضبط کیتی ویسی۔ مذکورہ ریفرنس اچ شریک ملزمان محمد نوازشریف دے پتر حسن نواز اتے حسین نوازدے دائمی وارنٹ گرفتاری جاری کرڈتے گین۔
