اسلام آباد۔5فروری (اے پی پی):وزیراعظم محمد شہبازشریف آکھیے پاکستانی اپݨے کشمیری بھراویں دی آزادی دی جدوجہد اچ انہاں دے رلے ہمیشہ کھڑے رہسن ، ہر بین الاقوامی فورم تے کشمیریاں تےبھارت ولوں کیتے ڳئے ظلم کوں دنیا دے سامݨے بے نقاب کیتے ، اساکوں قومی مفاد کیتے سیاسی وابستگیاں کوں بھلا تے ھک تھیوݨا ہوسی ۔ وزیراعظم آفس دے پریس وِنگ موجب وزیرِ اعظم محمد شہباز شریف اے ڳالھ اتوار کوں یومِ یکجہتیِ کشمیر دے موقع تے مظفر آباد اچ کْل جماعتی حریت کانفرنس دے وفد نال ملاقات اچ آکھی اے ۔ انہاں آکھیے پاکستان دا ٻچہ ٻچہ کشمیریاں دی آزادی دی جدوجہد اچ انہاں دے رلے ہے ، جے اساں ایویں قومی ایشوز تے اتحاد قائم رکھیسوں تاں کشمیر دی آزادی پرے کائنی ۔ کل جماعتی حریت کانفرنس دے رہنماواں وزیرِ اعظم پاکستان محمد شہباز شریف دی 5 فروری یومِ یکجہتیِ کشمیر تے کشمیریاں دے درمیان موجودگی کوں کشمیر کاز کیتے خوش آئند قرار ݙتا تے وزیرِ اعظم کوں دلوں خوش آمدید آکھیا ۔ وفد وزیرِ اعظم کوں اقوامِ متحدہ جنرل اسمبلی اچ بھارتی ظلم و جبر دی داستان کوں دنیا دے سامݨے بے نقاب کرݨ تے کشمیریاں دی آواز دنیا تئیں پڄاوݨ تے خراجِ تحسین پیش کیتا۔ ملاقات اچ اسپیکر آزاد کشمیر قانون ساز اسمبلی چوہدری انوار الحق، وزیرِ اعظم آزاد کشمیر سردار تنویر الیاس، کل جماعتی حریت کانفرنس دے رہنما محمود احمد ساغر، الطاف حسین وانی، محمد حسین خطیب، سید فیض نقشبندی، سید یوسف نسیم اتے منظور احمد الیاس ضیاء حسین شرکت کیتی۔ ایں موقع تے وفاقی وزراء خواجہ سعد رفیق، رانا تنویر حسین، مریم اورنگزیب، مرتضیٰ جاوید عباسی اتے مشیرِ وزیرِ اعظم قمر الزماں کائرہ وی موجود ہن۔
.jpg)
