اسلام آباد۔2اپریل(اے پی پی)وزیراعظم عمران خان آکھیے جو عدم اعتماد دی ناکامی کیتے منصوبہ بندی کر ڳھدی اے، ملک دے خلاف بیرونی سازش بے نقاب تھی چکی اے، منحرف اراکین غیر ملکی سازش دا حصہ نہ ٻݨسن، ایں سازش دے خلاف قوم پرامن احتجاج کرݨے، پاکستان مضبوط فوج پاروں اے، فوج نال میݙا کوئی اختلاف نئیں، ملک کوں کٹھا رکھݨ آلیاں قوتاں پاک فوج اتے تحریک انصاف ہین، اینڄھی خارجہ پالیسی دے حق اچ ہاں جیڑھی پاکستان دے عوام دے مفادات کیتے ہووے، مسلم لیگ (ن) کوں کرپٹ شریف خاندان دے علاوہ کوئی لیڈر نئیں ملدا، فوج دے نیوٹرل رہݨ دے بیان دا خیرمقدم کریندے ہیں۔ ”آپ کا وزیراعظم آپ کے ساتھ” اچ الیندے انہاں آکھیا جو پاکستان فیصلہ کن موڑ تے کھڑے، اے پاکستان دے مستقبل دی جنگ اے، ہک رستہ تباہی دا اتے ٻیا آزمائش دا اے، ایں ملک کوں کیہڑے پاسے ڳھن ونڄݨے اے نوجواناں دے ہتھ اے، اچھائی اتے برائی اچ غیر جانبدار رہݨ برائی دا نال تھیوݨ آلی ڳالھ اے، عدم اعتماد دی صورت اچ ملک دے خلاف سازش ثابت تھی گئی، غیرملکیاں دے اشارے تے اے ہتھکنڈے روکݨ ہک چیلنج اے جیندے خلاف اٹھݨا ہوسی، اے احتجاج اپݨیاں آوݨ آلیاں نسلاں کیتے ہووݨا چاہیدے نتاں اڳو تے کوئی وی ملک چوراں غداراں نال رل تے ایٹمی پاکستان اچ حکومت بدل ݙیسی۔ امر بالمعروف اللہ دا حکم اے، غداراں اتے ضمیر دے وپاریاں کوں ݙر سٹݨ کیتے پر امن احتجاج کرو۔ وزیراعظم آکھیے جو میں انہاں دا مقابلہ کریساں، ݙرݨ دی لوڑھ نئیں ووٹنگ اچ کامیابی ساکوں ملسی جآ اط کرپخن کیسز مکاآݨ کیتے اقتدار اچ آوݨ چاہندن، غیر ملکی سازش اچ شریک اپوزیشن رہنماواں دے خلاف قانونی کارروائی کیتے وکلا نال صلاح کیتی اے جیندا فیصلہ کر ڳھدا ویسی۔ انہاں آکھیا جیکر اے لوک آہدن جو امریکہ دے بغیر اساں مر ویسوں تاں اینڄھے دا مرݨ ہی چنڳاں اے، اساں صرف قانون دی حکمرانی ڳھن آوݨی اے، ہݨ پاکستان بدل چکیے، اڄ ہر کوئی سمڄھدے اینڄھاں سازشاں چلݨ آلیاں نئیں، میں انہاں کوں اسمبلی اچ وی ہراوݨ دا منصوبہ ٻݨایا ہوئے، قوم کݙاھیں انہاں چوراں کوں ولݨ نہ ݙیسی۔
