اسلام آباد – 03 – نومبر (اي پي پي) اطلاعات ۽ نشريات واري نگران وفاقي وزير مرتضيٰ سولنگي چيو آهي ته چونڊون منعقد ڪرڻ ۾ ڪو ابهام نه آهي، چونڊن جي تاريخ جي اعلان کانپوءِ سمورا شڪ شبها ختم ٿيڻ گهرجن، اسان ان آئيني عمل طرف وڌي رهيا آهيون جنهن تحت عوام هڪ سياسي حڪومت چونڊيندي، اليڪشن ڪميشن سمورين سياسي پارٽين کي برابر موقعا فراهم ڪندي، گذريل حڪومت جي قانوني ۽ آئيني فيصلن تي عمدلرآمد ڪرڻ اسان جي ذميواري آهي. اهڙن خيالن جو اظهار هن ”هم نيوز“ ۽ ”جي ٽي وي“ جي پروگرامن ۾ ڳالهائيندي ڪيو. نگران وفاقي وزير چيو ته وڏي ۽ سٺي خبر اها ئي آهي ته چونڊون 8 فيبروري تي ٿي رهيون آهن، اسان کي اڳ ۾ ئي يقين هو ته چونڊون ٿي وينديون. هن چيو ته چونڊون منعقد ڪرڻ ۾ ڪو ابهام ناهي رهيو، اليڪشن جي تاريخ جي اعلان کانپوءِ هاڻي سمورا شڪ شبها ختم ٿيڻ گهرجن. چونڊون منعقد ڪرڻ ۾ صدر، سپريم ڪورٽ، اليڪشن ڪميشن سڀني جو اتفاق راءِ موجود آهي. هن چيو ته سپريم ڪورٽ آف پاڪستان ان پوري عمل جي نگراني ڪئي آهي، سپريم ڪورٽ ۾ اڄ جيڪو فيصلو ٿيو آهي، ان تي اسان سڀني کي خوش ٿيڻ گهرجي. هن چيو ته پاڪستان جي آئين ۾ لکيل آهي ته هي ملڪ ان جا چونڊيل نمائندا هلائيندا ۽ اها ڳالهه خوشي جو سبب آهي ته اسان ان آئيني عمل طرف وڌي رهيا آهيون جنهن جي نتيجي ۾ عوام هڪ سياسي حڪومت چونڊيندي. هڪ سوال جي جواب ۾ نگران وفاقي وزير چيو ته نگران حڪومت جو ڪم اليڪشن ڪميشن کي سهولت فراهم ڪرڻ آهي، اسان پنهنجو فرض ايمانداري سان سرانجام ڏئي رهيا آهيون، صاف، شفاف ۽ غيرجانبدراڻيون چونڊون منعقد ڪرڻ ۾ اليڪشن ڪميشن جي هر ممڪن مدد ڪنداسين. هن چيو ته شڪايت ڪرڻ جو حق نه ٿو کسي سگهجي، جمهوريت ۾ خاموشي ناهي هوندي، نگران حڪومت آئين تحت قائم ٿي آهي ۽ اها ملڪ ۾ شفاف چونڊون منعقد ڪرڻ جي لاءِ پرعزم آهي. جيڪڏهن ڪنهن کي ڪا شڪايت آهي ته اليڪشن ڪميشن سان رجوع ڪري سگهي ٿو. هن چيو ته اليڪشن ڪميشن سمورين سياسي پارٽين کي برابر موقعا فراهم ڪندي، آئين ۽ قانون تحت سمورين سياسي پارٽين کي چونڊ مهم جي لاءِ 54 ڏينهن ڏنا ويندا. هڪ سوال جي جواب ۾ هن چيو ته آئون ان ڳالهه تي مطمئن آهيان ته سمورين پارٽين کي برابر موقعا ميسر آهن. رياستي ميڊيا جو ڪو به فيورٽ نه آهي، سمورين سياسي پارٽين کي برابر ڪوريج ڏني پئي وڃي. هڪ ٻئي سوال جي جواب ۾ نگران وفاقي وزير چيو ته چونڊن جي حوالي سان ڳڻتي ڦهلائڻ ڪجهه ماڻهن جو ڪاروبار آهي، ڪجهه ماڻهو چاهين ٿا ته ملڪ ۾ بي يقيني جي فضا رهي. ڪنهن کي اهڙي جڳهه تي جلسو ڪرڻ جي اجازت نه ٿي ڏئي سگهجي جنهن سان عوام جي لاءِ مشڪلاتون پيدا ٿين. هن چيو ته اهي سمورا ماڻهو جيڪي چونڊ وڙهڻ جا اهل هوندا، اهي چونڊ وڙهندا، پي ٽي آئي هڪ رجسٽرڊ سياسي پارٽي آهي، اها اليڪشن ۾ حصو وٺي سگهي ٿي، جيڪڏهن ڪنهن جو ڪو قانوني مسئلو آهي ته نگران حڪومت ان ۾ ڪجهه نه ٿي ڪري سگهي، اهو اسان جو ڪم نه آهي. هڪ ٻئي سوال تي هن چيو ته نگران ڪابينا جي ڪنهن ميمبر جي ڪا سياسي وابستگي نه آهي. نيب ترميمن جي حوالي سان سوال جي جواب ۾ نگران وفاقي وزير چيو ته اسان جي لاءِ پارليامينٽ سپريم ادارو آهي، نيب جي حوالي سان ترميمون پارليامينٽ ڪيون هيون. نجڪاري جي حوالي سان سوال تي هن چيو ته نجڪاري جي فهرست نگران حڪومت ناهي آندي، نجڪاري جو فيصلو گذريل حڪومت ڪري وئي آهي، گذريل حڪومت جي قانوني ۽ آئيني فيصلن تي عملدرآمد ڪرڻ اسان جي ذميواري آهي. هڪ ٻئي سوال جي جواب ۾ هن چيو ته نگران حڪومت ڊالر، اٽي، ڀاڻ، کنڊ جي اسمگلنگ جي روڪٿام جي لاءِ قدم کنيا، اسان جي ڪوشش آهي ته شين کي وڌيڪ بهتر ڪريون، اڄ ڪيترن ئي سالن کانپوءِ اسٽاڪ ايڪسچينج ۾ 100 انڊيڪس 53 هزار جي نفسياتي حد عبور ڪري ويو آهي. هن چيو ته اسان جي ڪوشش آهي ته اسان کي ملڪ جنهن حالت ۾ مليو هو، ان کان بهتر حالت ۾ چونڊيل نمائندن کي ڏئي وينداسين. هڪ ٻئي سوال تي هن چيو ته نگران وزيراعظم جو لمز يونيورسٽي ۾ وڃڻ سٺو قدم هو، نگران وزيراعظم نوجوانن سان ڳالهه ٻولهه ڪرڻ جو سلسلو جاري رکندو.
