اسلام آباد – 28 – مارچ (اي پي پي) وزيراعظم محمد شهباز شريف چيو آهي ته عدليه جي اندر مان اميد جي نئين ڪِرن سامهون آئي آهي، اڄ اسان کي فيصلو ڪرڻو آهي ته قانون ۽ آئين جي پيروي ڪرڻي آهي يا جهنگ جو قانون هلندو، جڏهن عدل ٿيندو نظر ايندو ته ملڪ تان خطرن جا ڪَڪر هٽي ويندا، آئين عدليه، انتظاميا ۽ مقننه جا اختيار طئي ڪري ريڊ لائين لڳائي ڇڏي آهي، پارليامينٽ آئين ۽ قانون تحت سڄي صورتحال کي بحث هيٺ آڻي فيصلو ڪري، جٿن سان عدليه کي بليڪ ميل ڪرڻ، آئين ۽ قانون کي نه مڃيندڙ لاڏلي کي ضمانتون ڏنيون پيون وڃن، اسان ان لاڏلي کي ملڪ سان کيڏڻ جي اجازت نه ڏينداسين، قانون پنهنجو رستو پاڻ ٺاهيندو، اڄ شرافت جو مقابلو بدمعاشي سان آهي، جمهوريت ۽ فسطائيت جي وچ ۾ ويڙهه آهي، هي گڏيل بصيرت سان فيصلو ڪرڻ جو وقت آهي، قانون کي تسليم نه ڪندڙن سان ڪا ڳالهه ٻولهه نٿي ٿي سگهي. قومي اسيمبلي ۾ خطاب ڪندي هن قومي اسيمبلي جي اسپيڪر ۽ پوري قوم کي آئين جي گولڊن جوبلي تي مبارڪباد ڏني ۽ چيو ته هي اهو دستاويز آهي جنهن جي تخليق جي لاءِ ان وقت جي وزيراعظم ذوالفقار علي ڀٽو ۽ ٻين مذهبي ۽ سياسي اڳواڻن سمورن اختلافن جي باوجود ۽ ذاتي پسند ۽ ناپسند رد ڪري هي آئين ٺاهيو جيڪو پاڪستان جي تاريخ ۾ هڪ روشن مثال آهي. هن چيو ته هن ايوان ۾ مسلمان ۽ غيرمسلم ٻئي ويٺل آهن، ملڪ جو مذهب اسلامي ۽ سياست جمهوري آهي، هن آئين اسان جي مذهبي روايتن سان گڏوگڏ چئني صوبن کي هڪ زنجير ۾ ويڙهي رکيو آهي، اسان جي اڳواڻن کي تاريخ سدائين سنهري لفظن ۾ ياد رکندي. هن چيو ته گذريل سال اسان اپوزيشن بئنچن تي ويٺل هئاسين ۽ مختلف سياسي پارٽين ملڪ کي مشڪل حالتن مان ڪڍڻ ۽ رياست کي بچائڻ جي لاءِ پنهنجي سياست کي داءُ تي لڳايو ۽ بي اعتمادي جي رٿ آڻڻ جو فيصلو ڪيو. هن چيو ته 1971ع جي سانحي ۾ پوري قوم جي لاءِ هڪ سبق هو ته پاڪستان کي وجود ۾ ايندي اڃا 25 سال گذريا هئا ته ملڪ ٻه ٽڪر ٿي ويو جڏهن ته ڪروڙين مسلمانن پنهنجي جانين جا نذرانا پيش ڪيا ۽ قربانيون ڏنيون. هن چيو ته آئين ادارن جي اختيارن ۾ ورڇ واضح ڪري ڇڏي آهي ته عدليه، انتظاميا ۽ مقننه جا هي هي اختيار هوندا، آئين هڪ ريڊ لائين لڳائي ڇڏي آهي. هن چيو ته اڄ ان آئين جو سنگين مذاق اڏايو پيو وڃي، انهي آئين ۾ لکيل عدليه جي اختيارن جون ڌڄيون اڏايون پيون وڃن، هڪ لاڏلو ڪنهن عدالت آڏو نوٽيسز ملڻ جي باوجود پيش نه ٿو ٿئي ۽ رات جي اونداهي ۾ ان کي ريليف ملي ٿو، هن عدليه جو مذاق اڏايو، عورت جج جي حوالي سان ان جي ڳالهين جو ڪنهن نوٽيس نه ورتو. هن چيو ته جڏهن اسان اپوزيشن ۾ هئاسين ته ڪهڙي طرح اسان جي خلاف بدديانتي سان ڪوڙا ڪيس ٺاهيا، قوم جي هڪ ڌيءَ کي عيد جي رات گرفتار ڪيو وڃي ٿو ۽ اها جيل ۾ پيءُ سان ملڻ اچي ٿي ته ان کي گرفتار ڪيو وڃي ٿو، ڇا ڪنهن ان ڳالهه جو ڪو ايڪشن ورتو؟ ۽ هڪ لاڏلو جيڪو قانون کي رديءَ جي ٽوڪري ۾ اڇلائي رهيو آهي ان جو ڪنهن نوٽيس نه ورتو، هي اهو ئي لاڏلو آهي جنهن جي حوارين سپريم ڪورٽ ٻاهران گندا ڪپڙا لٽڪايا ۽ قبرون کوٽيون. هن چيو ته ان لاڏلي جي حڪومت آءِ ايم ايف سان جيڪو معاهدو ڪيو ان جي خلاف ورزي موجوده حڪومت نه ڪئي پر ان لاڏلي پاڻ خلاف ورزي ڪئي ۽ ملڪ کي ڏيوالپڻو ٿيڻ جي ويجهو پهچائي ڇڏيو، اسان وڏي مشڪل سان ملڪ کي ڏيوالپڻو ٿيڻ کان بچايو، هاڻي آءِ ايم ايف اسان کان هر قدم تي ضمانتون گهري ٿو، ناڻي واري وزير کي خراج تحسين پيش ڪريان ٿو ته جنهن ملڪ کي انهن حالتن مان ڪڍڻ جي لاءِ پنهنجو ڀرپور ڪردار ادا ڪيو آهي. هن چيو ته عمران نيازي جي چار سالا دور ۾ ملڪ جا 70 سيڪڙو قرض وڌي ويا ۽ هڪ نئين سرهه تائين نه لڳائي وئي، هن چيو ته 2 ڪروڙ نوڪرين ۽ 50 لک گهرن جو واعدو ڪيو ويو هو. هن چيو ته رمضان ۾ چئني صوبن ۾ مفت اٽو ورهايو پيو وڃي. هن چيو ته سفيد پوش طبقو تنگدست ضرور هوندو آهي پر ڪنهن جي آڏو هٿ نه ٽنگيندو، پر اڄ سفيد پوش طبقو به لائينن ۾ لڳل آهي، هي اها تباهي آهي جنهن تي عمران نيازي ملڪ کي پهچائي ڇڏيو آهي. هن چيو ته الزام اهو هنيو ويو ته هي حڪومت آمريڪي سازش تحت قائم ٿي آهي، هو ڪيترن ئي مهينن تائين اهو ڪوڙ قوم آڏو ڳالهائيندور هيو، ان لاڳيتو ڪوڙ ڳالهائڻ جي ڪري ماڻهو اهو سمجهڻ شروع ٿي ويا ته واقعي آمريڪا جي سازش تحت حڪومت ڪيرائي وئي آهي؟ پر هاڻي هو پاڻ اهو چئي رهيو آهي ته اها آمريڪي سازش نه هئي اها پنهنجن جي سازش هئي، ان جي اهڙي طرح جي ٽوپي ڊرامن پاڪستان جا بنياد لوڏي ڇڏيا آهن. هن چيو ته پرڏيهي وزير بلاول ڀٽو زرداري ۽ اسان آمريڪا سميت دوست ملڪن سان لاڳاپن کي بهتر بڻائڻ جي لاءِ ڪوششون ڪري رهيا آهيون. هن چيو ته چين سميت ٻين ڀائر ملڪن سان پرڏيهي محاذ تي هن لاڳاپا خراب ڪيا. هن چيو ته هاڻي نوان ماڻهو تيار ڪري پاڪستان جي خلاف بيان ڏياريا پيا وڃن، هي اسان کي چوندا هئا ته اپوزيشن وارن کي سفارتڪارن سان ملڻ جو ڪو حق نه آهي، هاڻي هي پاڻ ڏينهن رات سفارتڪارن سان ملاقاتون ڪري رهيا آهن، هي اهي حالتون آهن ته جنهن جي ڪري قوم حيرت ۾ آهي ۽ پوري قوم ورڇ در وڇ ٿي، پر هن لاڏلي کان ڪير پڇڻ وارو نه آهي، الله تعاليٰ پاڪستان جي حفاظت فرمائيندو پر هن لاڏلي کي ملڪ سان کيڏڻ جي اجازت نه ڏينداسين، قانون پنهنجو رستو پاڻ ٺاهيندو. هن چيو ته ڪڏهن ناهي ڏٺو ته قانون لاڳو ڪندڙ ادارن تي پٿراءُ ڪيو وڃي پيٽرول بم اڇلايا وڃن. هن چيو ته 1973ع جي آئين پاڪستان کي قائم ۽ دائم رکيو آهي. وزيراعظم چيو ته پي ٽي آءِ جي سوشل ميڊيا ٽرولرز لسٻيلا جي شهيدن جي لاءِ غليظ ڳالهيون ڪيون. هن چيو ته پاڪ فوج، پوليس ۽ ٻين سيڪيورٽي ادارن جي 80 هزار کان وڌيڪ جوانن پنهنجي جانين جا نذرانا پيش ڪري ملڪ کي دهشتگردي کان محفوظ بڻايو. هن چيو ته هن ايوان کي انهن معاملن جو فوري طور تي نوٽيس وٺڻو پوندو، 29 نومبر تي پاڪستان جي نئين سپهه سالار ۽ چيئرمين جوائنٽ چيفس آف اسٽاف جي چونڊ ٿي، مون ڪابينا ۽ پنهنجي ساٿين سان ان معاملي تي پوري طرح مشاورت ڪئي، مون کي ڪو به فيصلو ڪرڻو هوندو آهي ته آئون پنهنجي ساٿين سان مشورو ڪندو آهيان، اهو وزيراعظم جو فيصلو ناهي هوندو ڪابينا جو فيصلو هوندو آهي، جنرل عاصم منير کي چيف آف آرمي اسٽاف ۽ جنرل ساحر شمشاد مرزا کي چيئرمين جوائنٽ چيفس آف اسٽاف بڻائڻ جو فيصلو مڪمل طور تي ميرٽ تي ڪيو ويو. هن چيو ته اسان جو سپهه سالار حافظ قرآن پڻ آهي، پي ٽي آءِ جا ٽرولرز پاڪ فوج جي ليڊرشپ جي لاءِ بدترين ۽ غليظ زبان استعمال ڪري رهيا آهن، ان سان دشمن خوش نه ٿيندو ته ڪير خوش ٿيندو، جيڪڏهن ان جي اجازت ڏني وئي ته تاريخ اسان کي معاف نه ڪندي، ان کان اڳ جو اسان کي دير ٿي وڃي، هن ايوان کي ٺوس حڪمت عملي اختيار ڪرڻي پوندي. هن چيو ته اسان جي خلاف ماضي ۾ جعلي ڪيس ٺاهيا ويا ۽ انهن کي جلدي ايتري هئي جو خواجه آصف سميت اسان جا ساٿي جيل وڃن ۽ انهن کان ڪير پڇڻ وارو نه هجي ۽ ”مرزا يار اڪيلا ڦري.“ هن چيو ته انهن دل ڏکوئيندڙ واقعن جو ڪنهن پاڻمرادو نوٽيس نه ورتو. هن چيو ته فارن فنڊنگ جو ڪيس اسان شروع نه ڪيو، ان جي پنهنجي ساٿي اڪبر ايس بابر شروع ڪيو، ان جا تفصيل اسٽيٽ بئنڪ فراهم ڪيا، مني لانڊرنگ عمران نيازي ڪئي، ووٽن ڪرڪيٽ ڪلب جو پئسو اسڪولن ۽ اسپتالن تي لڳڻو هو پر اتي نه لڳو ۽ عمران خان ۽ حوارين جي کيسن ۾ هليو ويو. هن چيو ته خانه ڪعبه جي ماڊل جي گهڙيءَ کي وڪرو ڪري ڇڏيو ۽ بعد ۾ جعلي رسيد پيش ڪري ڇڏي، ان ڪيس جو ڇا ٿيو؟ هن چيو ته عمران نيازي جيڪوعدالتن جي آڏو پيش نه ٿو ٿئي ۽ عدليه جو مذاق اڏائي رهيو آهي، جون ڏينهن رات ضمانتون ٿي رهيون آهن، اهو انصاف جو نظام ۽ ترازو آهي؟ هن چيو ته اهو منهنجي ذات جو معاملو نه آهي هي ملڪ جي اڳتي ايندڙ نسلن جو معاملو آهي ته اسان انهن جي لاءِ اهڙو نظام ڇڏينداسين. محمد شهباز شريف چيو ته هڪ آڊيو ۾ سپريم ڪورٽ جي هڪ جج بابت ڪجهه انڪشاف سامهون آيا الله کي خبر آهي ته اهي حقيقتن تي ٻڌل آهن يا نه پر سپريم ڪورٽ ان جي فرانزڪ آڊٽ ڪرائي، جيڪڏهن اها وڊيو ڪوڙي آهي ته مرتڪب ماڻهو کي سزا ڏني وڃي ۽ جيڪڏهن صحيح آهي ته پوءِ قانون تحت ڪارروائي ڪئي وڃي. هن چيو ته جن جي خلاف ڪيس ٺاهيا ويا انهن جي خلاف اڄ تائين ڪو ثبوت سامهون ناهي آيو پر جن جي خلاف ڳالهيون سامهون آيون ٻڌايو وڃي ڪيترن ججن کي ڪرپشن جي ڪيسن ۾ ڪڍيو ويو؟ جڏهن ته سياستدانن جي خلاف اکيون بند ڪري آمدني کان وڌيڪ اثاثن جا ڪيس ٺاهيا وڃن ٿا، اڄ هن ايوان کي اهو فيصلو ڪرڻو پوندو ته ڇا اسان اکيون بند ڪري ڍڳين مينهن وانگر رڙيون ڪندا وينداسين يا پوءِ آئين ۽ قانون جي حڪمراني ٿيندي. وزيراعظم چيو ته جيڪڏهن ڪو ٻيو اهو سڀ ڪجهه ڪري ٿو ته ان کي ڪاري پاڻي تائين پهچايو وڃي ٿو پر هن لاڏلي جو ڪير ڪجهه بگاڙي نه سگهيو. هن چيو ته سڀني ڏٺو ته ڪهڙي طرح عمران نيازي 2021ع ۾ دهشتگردن کي واپس وٺي آيو ۽ انهن کي هتي رهڻ جي آڇ ڪئي ۽ اهي ڪير ماڻهو هئا جن سوات ۽ ٻين علائقن ۾ دهشتگردن کي رهايو ۽ ڪهڙي طرح دهشتگردي ٻيهر ڪنڌ کنيو، پوليس، فوج ۽ ٻين ادارن جي آفيسرن ۽ جوانن پنهنجي جانين جا نذرانا پيش ڪيا، ان سڄي معاملي جي ڇنڊڇاڻ ٿيڻ گهرجي. هن چيو ته دهشتگرد، دهشتگرد ئي هوندو آهي ڪير گُڊ آر بيڊ ناهي هوندو. هن چيو ته هي ڇا هو ۽ ڪهڙي منصوبابندي هئي؟ ڇا ان جو مقصد هڪ ڀيرو ٻيهر اليڪشن ۾ جهرلو هلائڻو هو؟ هن چيو ته 2018ع جي چونڊن ۾ آر ٽي ايس بند ڪري جهرلو هلايو ويو ۽ هڪ لاڏلي کي کٽرائي پذيرائي ڪئي وئي، ان کانپوءِ چور ۽ ڌاڙيل جو بيانيو ايترو هلايو ويو جو عام ماڻهن کي ان ڪوڙ تي سچ جو گمان ٿيڻ لڳو پر الله پاران سچ سامهون آيو ۽ توشه خانه جو ڪيس سامهون اچي ويو. هن چيو ته جوڊيشل ڪمپليڪس ۾ ٿيندڙ واقعي تي جي آءِ ٽي ٺهي چڪي آهي ان جي ذريعي حقيقتن جي بنياد تي قوم آڏو سچ آندو ويندو، هي اها جي آءِ ٽي نه آهي ته ثاقب نثار صاحب پاناما کي اقاما بڻايو، عمران نيازي عدليه جي توهين ڪري ٿو پر ڪنهن به نه پڇيو، يوسف رضا گيلاني کي توهين عدالت جي سزا ڏني وئي. هن چيو ته اهو ئي سبب آهي جو قرب ۽ جواب جا سمورا ملڪ اڳتي نڪري ويا پر اسان کي غربت، بيروزگاري درپيش آهي، اچو گڏجي ويهون ته قانون جي حڪمراني ۽ انصاف جي لاءِ فيصلو ڪريون ته جيئن ايندڙ نسلن جو نقصان نه ٿئي، اڄ شرافت جو مقابلو بدمعاشي سان آهي، جيڪڏهن اهڙي طرح معاملا رهيا ته خدا نه ڪري اسان جو مستقبل اونداهو ٿي ويندو، هاڻي وقت جي قدر نه ڪئي ته پوءِ اهو هٿ ۾ نه ايندو. هن چيو ته جٿن سان عدليه کي بليڪ ميل ڪرڻ، آئين ۽ قانون کي نه مڃيندڙن کي ضمانتون ڏنيون پيون وڃن. هن چيو ته اهڙو نظام گهڻي دير تائين قائم نه ٿو رهي سگهي ان جي فوري اصلاح جي ضرورت آهي، جٿن جي ذريعي عدليه کي دٻائي اهڙا فيصلا ڪيا ويا ۽ ملڪ جو نقصان ٿيو ته ان جو ذميوار ڪير هوندو؟ هن چيو ته چونڊون جمهوريت جو حسن آهن، سنڌ صوبي ۾ ايم ڪيو ايم ۽ بلوچستان جا آدمشماري تي حقيقي خدشا آهن. هن چيو ته اسان کي ڪابينا کان فيصلا ڪرائڻ جو درس ڏنو وڃي ٿو، توهان پاڻ به پنهنجو ڪابينا کان فيصلو ڪرايو. هن چيو ته ڪشمير ڪانفرنس، ڪوويڊ ڪانفرنس، فيٽف جا معاملا هجن ته هو سڀ ڪجهه حقارت سان ٿڏي ڇڏي ٿو ڇو ته ان ۾ پٿر جو دل آهي، عمران نيازي تاريخ جو سڀ کان وڏو فراڊيو آهي، ڏينهن رات چار سال تائين مديني جي رياست جي ڳالهه ڪندو رهيو، جڏهن توشه خانه ۽ خانه ڪعبه جي گهڙيءَ جا واقعا سامهون آيا ته مديني جي رياست جي ڳالهه نه ڪري رهيو آهي، مديني جي رياست جو نالو وٺي قوم سان ڪوڙ ڳالهايو ويو ۽ بدديانتي ڪئي وئي، قانون کي تسليم نه ڪندڙن سان ڳالهه ٻولهه نه ٿي ٿي سگهي، هن آئين ۽ قانون کي نقصان پهچايو آهي، اسان وٽ آئين ۽ قانون کانسواءِ ڪجهه نه آهي، عمران نيازي پوري قوم کان پنهنجي ڌاڙن ۽ چوري، عدليه ۽ چيف آف آرمي اسٽاف جي خلاف ڳالهيون ڪرڻ جي معافي وٺي، هن چيو ته گذريل ڏينهن اعليٰ عدليه جي جن ججن جسٽس منصور علي شاهه ۽ جسٽس جمال خان مندوخيل پنهنجي فيصلي ۾ چيو ته چار ججن حق ۾ فيصلو ۽ ٽن ميمبرن خلاف ڏنو. ان فيصلي ۾ انهن جيڪي سوال اٿاريا آهن ان حوالي سان ايوان مشاورت ڪري جائزو وٺي ته اسان ڇا قانونسازي ڪري سگهون ٿا، انهن ججن جي ڪالهه جي فيصلي کانپوءِ اها ڳالهه ظاهر ٿئي ٿي ته عدليه جي اندر مان اميد جي نئين ڪرن سامهون آئي آهي. هن چيو ته جڏهن عدل نظر ٿيندو اچي ته ملڪ تان خطرن جا ڪَڪر هٽي ويندا. هن چيو ته انصاف جو مان مٿانهون ٿيڻ گهرجي، ان جي لاءِ اسان کي آئين اجازت ڏي ٿو ته اسان قانونسازي ڪريون، جيڪڏهن اسان اهو نه ڪيو ته مورخ اسان کي معاف نه ڪندو. هن چيو ته اڄ اسان کي فيصلو ڪرڻو آهي ته اسان کي قانون ۽ آئين موجب فيصلو ڪرڻو آهي يا هتي جهنگ جو قانون هلندو. وزيراعظم سپريم ڪورٽ جي گذريل ڏينهن جي فيصلي جا ڪجهه پيراز پڻ پڙهي ٻڌايا. هن چيو ته چار ٽي جي فيصلي تحت جيڪي سوال اٿاريا ويا آهن، انهن بابت پڻ غور ڪرڻو پوندو ۽ رياستي ادارن، عدليه، انتظاميا ۽ مقننه کي پنهنجو ڪردار ادا ڪرڻو پوندو. هن چيو ته ايندڙ نسلن ۽ پاڪستان جو وڃايل مقام ڏيارڻ جي لاءِ اسان کي پنهنجو فرض ادا ڪرڻو پوندو نه ته ايندڙ نسلون اسان کي معاف نه ڪنديون.
