اسلام آباد۔4جولائی(اے پی پی)سپیشل جج سنٹرل ہمایوں دلاور قومی خبر رساں ادارے ’’اے پی پی‘‘اچ کروڑاں روپے دی کرپشن کیس اچ نامزد ملزمان دی قبل از گرفتاری ضمانتاں منسوخ کرݙتن۔ ملزمان احاطہ عدالت توں بھڄ ڳئن، ملزماں دی گرفتاری سانڳے ایف آئی اے دے چھاپے جاری ہن۔ خمیس کوں عدالت اے پی پی دے شعبہ آئی ٹی دے پروجیکٹ دے کرپشن کیس اچ ملزمان اوں ویلھے دے ڈائریکٹر آئی ٹی اتے پراجیکٹ ڈائریکٹرغواث خان، سابق منیجر اکائونٹس ارشد مجید چوہدری، ڈپٹی ڈائریکٹر آئی ٹی مصور عمران اتے چیف کمپیوٹر انجینئر سعد مدثر سودھا چھی ملزمان دی درخواست قبل از گرفتاری ضمانت تے سݨیج کیتی۔ ایں موقع تے اے پی پی دے لیگل ایڈوائزر سردار محمد یعقوب مستوئی دلائل ݙیندے آکھیے جو ملزمان پیپرا رولز دی خلاف ورزی کریندے ہوئے قومی ادارے کوں کروڑاں روپے دا ضیان پڄائے لہٰذا ملزماں دی درخواست ضمانت مسترد کیتی ونڄے ۔عدالت سردار محمد یعقوب مستوئی دے دلائل نال اتفاق کریندے ہوئیں چھی ملزماں دی درخواست ضمانت قبل از گرفتاری مسترد کرݙتی ٻھل سارے ملزمان احاطہ عدالت توں بھڄݨ اچ کامیاب تھی ڳئن۔ ایں توں پہلے وفاقی تحقیقاتی ادارہ ایف آئی اے دے اینٹی کرپشن ونگ تحقیقات کرتے ملزماں دے خلاف مقدمہ درج کر تے کارروائی شروع کیتی ہئی جیندے مطابق ایف آئی اے کوں انکوائری اچ ثابت تھئے جو ایسوسی ایٹڈ پریس آف پاکستان کارپوریشن (اے پی پی سی) دی پروکیورمنٹ کمیٹی ٹھیکیداراں نال رل تے سرکاری خزانے کوں 124.96 ملین (12 کروڑ 49 لکھ روپے) دا ضیان پڄائے ایں منصوبے دی مجموعی لاڳت 786.79 ملین روپے ہئی ۔ انکوائری اچ پتہ لڳے جو پروکیورمنٹ کمیٹی دے ممبران اوں ویلھے دے پروجیکٹ ڈائریکٹر محمدغواث، ڈپٹی ڈائریکٹر آئی ٹی مصور عمران اتے چیف کمپیوٹر انجینئر سعد مدثر شامل ہن جنہاں ٹھیکیداراں میسرز آرٹ ٹیک پرائیویٹ لمیٹڈ، میسرز تیجاریا، میسرز کامٹیل اتے میسرز نیو ہوریزن نال رل تے ادارے دے پراݨے آلات کوں جدید ٹیکنالوجی نال وٹا تے خبراں دے آپریشن دی نویں سروں تنظیم دے منصوبے اچ خریداری دے عمل اچ متعلقہ قواعد و ضوابط دی خلاف ورزیاں کریندے ہوئیں قومی خزانے کوں ضیان پڄائے۔ ایف آئی اے ملزماں دے خلاف دھوکہ ݙیوݨ، فراڈ، مجرمانہ بدانتظامی، قواعد دی خلاف ورزی، اختیارات دا غلط استعمال، سرکاری خزانے کوں ودھ ضیان پڄاوݨ تے سرکاری فنڈزدے غلط استعمال دی دفعات سانڳے مقدمہ درج کیتے ۔ انھاں ملزماں اچ محمد غواث (پراجیکٹ ڈائریکٹر)، مصور عمران (ڈپٹی ڈائریکٹر )، سعدمدثر (چیف کمپیوٹر انجینئر ) بلال ظفر (ڈپٹی ڈائریکٹر سائبر ونگ وزارت اطلاعات)، ارشد مجید چوہدری(منیجر اکائونٹس)، ضیاء اللہ بھٹو (ڈائریکٹر ایڈمن اینڈ پی اینڈ ڈی)، میسرز تیجاری پاکستان پرائیویٹ لمیٹڈ، میسرز نیو ہوریزن، میسرز آرٹ ٹیک سسٹم، میسرز میڈیا لنکس دے عہدیداران شامل ہن۔ مذکورہ ملزماں دے خلاف سیکشن 34.409 ، 420، 468، 471 ، PPC r/w 5(2) 47 PCA دے تحت مقدمہ درج کیتا ڳیا۔ اتھاں اے ݙساوݨ ضروری اے جو ایف آئی اے اسلام آباد زون دے ڈائریکٹر سید شہزاد ندیم بخاری، ایف آئی اے اینٹی کرپشن سرکل اسلام آباد دے ڈپٹی ڈائریکٹر محمد افضل نیازی اتے اسسٹنٹ ڈائریکٹر شاہد پرویز ملک ایں بدعنوانی کیس اچ میرٹ تے شفافیت نال پکے ثبوت جمع کیتے تے ٻہوں محنت نال انکوائری مکمل کیتی۔ تفتیشی افسراں عدالت اچ تکڑے انداز اچ کیس پیش کیتے۔ ملزمان دی گرفتاری سانڳے ایف آئی اے ٹیماں ٻݨیدے ہوئیں کارروائی شروع کر ݙتی اے۔
