اسلام آباد۔28مئی (اے پی پی) نیشنل ڈیزاسٹرمینجمنٹ (این ڈی ایم اے) دے ترجمان خبردار کیتا جو 28 مئی توں یکم جون ملک دے اتلے علاقیاں اچ دھوڑ مٹی، اندھاری اتے ڳاڄ کھمݨ نال مینہ وسݨ دا امکان اے۔ متعلقہ ادارے محتاط رہن۔ لینڈ سلائیڈ، مٹی دے تودے، بالائی علاقیاں اچ سڑکاں اتے ٹریفک دے نظام کوں متاثر کر سڳدن۔ جاری بیان اچ ترجمان آکھیا جو بالائی علاقیاں اچ مینہ پاروں مقامی نالیاں اچ طغیانی دا ݙر اے ادارے الرٹ رہن۔ ضلعی انتظامیہ کوں کچے گھراں توں لوکاں کوں ویلھے تے محفوظ ڄاہ تے پجاوݨ دی ہدایت کر ݙتی ڳئی اے۔ اندھاری تے جھکڑ پاروں کھڑی فصلاں، بجلی دے کھمبے اتے ٻئی تعمیرات دے ضیان دا ݙر اے۔ ممکنہ لینڈ سلائیڈنگ پاروں سیاح تے مسافر پہاڑی علاقیاں اچ سفر اچ احتیاط کرن۔
