اسلام آباد۔1دسمبر(اے پی پی):وزیراعظم محمد شہباز شریف آکھیے جو پاکستان پولیو مکاوݨ کیتے پرعزم اے، کڄھ مخصوص علاقیاں توں علاوہ ہر ڄاہ تے پولیو مکا ݙتے، سیاسی اختلافات پک پاسے سٹ تے پورا ملک پولیو مکاوݨ کیتے ہک مٹھ اے، پولیو مکاوݨ دے اقدام کوں خراب کرݨ دی کہیں کوں وی اجازت نا ݙتی ویسی۔ اے ڳالھ انہاں پولیو مکاوݨ بارے گلوبل پولیو ریڈکشن انیشیٹو (عالمی اقدام )دے وفد نال الیندے آکھی جیندی اڳواݨی چیئرمین پولیو اوورسائٹ بورڈ اتے بل اینڈ میلنڈ ا گیٹس فائونڈیشن دے صدر ڈاکٹر کرسٹوفر ایلس کیتی۔ وفد اچ ڈبلیو ایچ او دے ریجنل ڈائریکٹر ڈاکٹر احمد المندھاری، ریجنل ڈائریکٹر یونیسف جارج لاریہ ادجی، نیشنل چیئرمین این پی پی سی عزیز میمن، روٹری انٹرنیشنل اتے پولیو مکاوݨ دے پروگرام دے شراکت داراں و امدادی اداریاں دے نمائندیاں شرکت کیتی۔ وزیراعظم آکھیا جو حکومت ملک کوں پولیو توں پاک کرݨ اتے ہر ٻال کوں پولیو توں بچائو دے قطرے پلاوݨ کیتے کوششاں جاری رکھسی، پوری پاکستانی قوم بل اینڈ میلنڈا گیٹس فاؤنڈیشن، روٹری انٹرنیشنل، یونیسیف اتے ڈبلیو ایچ او سودھا ساڈے شراکت داراں اتے امدادی اداریاں دے شکر گزار ہیں۔ وفد پاکستان توں پولیو مکاوݨ کیتے مکمل تعاون دا یقین ݙویندے پاکستان دی پولیو مکاوݨ کیتے کوششاں دی تعریف کیتی۔
