اسلام آباد۔25اگست (اے پی پی):پاکستان اچ چین دے سفیرنونگ رونگ آکھیے جو چین دی حکومت سیلاب متاثرین کیتے ریڈ کریسنٹ سوسائٹی دے زریعے پاکستان کوں مالی معاونت ݙتی اے جݙاں جو پاکستان اچ کم کرݨ آلیاں چینی کمپنیاں کوں وی سیلاب توں متاثرہ لوکاں دی امداد کیتے متحرک کرݙتا ڳئے ۔وفاقی وزیرصنعت وپیداوارسیدمرتضیٰ محمود نال ملاقات اچ ڳالھ مہاڑ کریندے ہوئیں آکھی اے ۔ملاقات اچ ݙوطرفہ دلچسپی تے پاک چین معاونت متعلق امورداجائزہ ڳھدا ڳئے۔ وفاقی وزیرصنعت وپیداوار آکھیے جو اڄوکے مینھ تے سیلاب توں قیمتی انسانی جاناں دے ضیان دے نال نال زراعت کوں بھاری ضیان پڄے ، سیلاب توں متاثرہ علاقیں اچ فصلاں تباہ تھئن، انہاں آکھیے جو ݙوہیں ملکاں برآمدی زونز متعلق طویل المیعاد پالیسیاں دے ذریعے ڳالھ کرسڳدن تے تجاویز ݙے سڳسن کیوں جو چین اچ ویں ویلھے 700 دے نیڑے ایجھے زونز موجود ہن ، پاکستان اچ ایں ویلھے 8 برآمدی زونز آپریشنل ہن ۔ وفاقی وزیرآکھیے جو پاکستان ایں ویلھے چین کوں رتی مرچ برآمدکریندا پئے تے تے اینکوں مزید ودھاوݨ دی گنجائش موجود اے ۔چین دے سفیر یقین ݙیوائے جو چین دی حکومت جدید ٹیکنالوجی تے تربیت یافتہ منیجمنٹ دے ذریعے پاکستان اچ زراعت دے ودھارے تے فصلاں دی پیداواراچ ودھاوݨ کیتے معاونت کریسی ۔ وفاقی وزیرصنعت وپیداوارآکھیے جو پاکستان اچ ایں ویلھے چین دیاں آٹوموبائل کمپنیاں کم کریندیاں پئن ، انہاں پاکستان اچ مزید چینی سرمایہ کاری دی لوڑھ تے زور ݙتا تے آکھیے جو پاکستان اچ سستی افرادی قوت اتے مسابقتی مارکیٹ دستیاب اے۔ پاکستان اچ مزید چینی سرمایہ کاری توں ملکی پیداوارودھاوݨ دیاں کوششاں اچ مدد مل ویسی ، انہاں چینی سفیر کوں 1500 ایکڑ تے مشتمل دھابیجی خصوصی اقتصادی زون اچ چینی انڈسٹری دے قیام دی پیشکش وی کیتی تے آکھیے جو چینی کمپنیاں اتھوں حاصل پیداوارکوں دنیا اچ برآمد کرسڳدی اے ۔
