قلعہ سیف اللہ۔1اگست (اے پی پی) وزیراعظم شہبازشریف طوفانی بارشاں اتے سیلاب توں متاثرہ لوکاں کیتے خشنوب وستی اچ رہوݨ آلے لوکاں کوں کھاوݨ پیوݨ نہ ہووݨ اتے مریضاں دا ریکارڈ نہ ہووݨ تے کاوڑ کریندیں ہوعین آکھیا جو کوتائی کرݨ آلیاں دے خلاف سخت ایکشن ڳھدا ویسی۔ متاثرین کوں کہیں قسم دی کوئی تکلیف نہ تھیوے۔ کاغذی کاروائی برداشت کائنا کریسوں۔ وفاقی حکومت ریلیف اتے بحالی دے کماں اچ صوبائی حکومتاں نال تعاون کریسی، متاثرین کوں معاوضے دی فوری ادائیگی کیتی ونڄے. اے ڳالھیں انہاں سنوار کوں خشنوب اچ خیمہ وستی دے دورے تے موقع تے صحافیاں نال ڳالھ مہاڑ کریندیں ہوئیں آکھی۔ ایں موقع تے وزیراعلیٰ بلوچستان عبدالقدوس بزنجو ، وفاقی وزیرہائوسنگ مولانا عبدالواسع، وفاقی وزیر اطلاعات تے نشریات مریم اورنگزیب ، وفاقی وزیر انسداد منشیات شاہ زین بگٹی، وفاقی وزیر دفاعی پیداوار اسرار ترین ، وزیر مملکت برائے توانائی محمدہاشم نوتیزئی اتے رکن قومی اسمبلی صلاحی الدین ایوبی وی وزیراعظم دے نال ہن۔ وزیراعظم آکھیا جو طوفانی بارشاں اتے سیلاب توں متاثرہ لوکاں کیتے ٻݨائی ڳئی خیمہ وستی دا دورہ کیتا پر کجھ کمزوریاں سامھے آئن جئیں تے فوری ایکشن ڳھدا ویسی۔ ایں موقع تے بلوچستان دے وزیراعلیٰ عبدالقدوس بزنجو خیمہ وستی اچ کھاوݨ پیوݨ دے نہ ہووݨ تے ڈپٹی کمشنر قلعہ سیف اللہ، متعلقہ تحصیلداراتے پی ڈی ایم اے دے انچارج کوں معطل کر تے انکوائری کرݨ دا حکم ݙیندیں ہوئیں چیف سیکرٹری کوں آکھیا جو انہاں افسراں دے خلاف کاروائی کیتی ونڄے۔ اڄ توں خیمہ وستی اچ سارے ماترین کوں کھاوݨ پیوݨ دی سہولت ݙتی ونڄے۔
