اسلام آباد – 22 – فيبروري (اي پي پي) وزيراعظم محمد شهباز شريف هدايت ڪئي آهي ته اسلام آباد جي ڳوٺاڻن علائقن جي رهواسين کي بهترين سهولتون فراهم ڪيون وڃن، اسلام آباد ۾ جاري ترقياتي ڪمن تي 24 ڪلاڪ ڪم يقيني بڻايو وڃي، هر منصوبي جي ٿرڊ پارٽي ويليڊيشن يقيني بڻائي وڃي، اسلام آباد ۾ سالڊ ويسٽ مئنيجمينٽ جي ٺوس نظام جي تعارف جي حوالي سان سي ڊي اي رپورٽ پيش ڪري، اسلام آباد ۾ پارڪنگ جا مسئلا فوري طور تي حل ڪيا وڃن. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف جي صدارت ۾ اسلام آباد ۾ جاري ترقياتي منصوبن تي جائزه اجلاس ٿيو. اجلاس ۾و زيراعظم اسلام آباد جي ڳوٺاڻي علائقن جي ترقي ۽ انفراسٽرڪچر جي حوالي سان پڻ تفصيل طلب ڪيا. وزيراعظم جي سمنڊ پار پاڪستانين جي لاءِ سي ڊي اي جي منصوبن کي تيز رفتاري سان مڪمل ڪرڻ جي هدايت ڪندي چيو ته سمنڊ پار پاڪستانين جي لاءِ جاري منصوبن کي عالمي معيار تي تعمير ڪيو وڃي، سمنڊ پار پاڪستانين جي لاءِ منصوبن کي شفاف ۽ طريقيڪار آنل ائين بڻايو وڃي، سمنڊ پار پاڪستانين کي پاڪستان ۾ سيڙپڪاري جي لاءِ هر قسم جي سهولت فراهم ڪئي وڃي. وزيراعظم اسلام آباد ۾ ترقياتي منصوبن تي ڪم جي رفتار کي تيز ڪرڻ ۽ عوامي منصوبن کي ترجيحي بنيادن تي مڪمل ڪرڻ جي لاءِ جائزه ڪميٽي قائم ڪري ڇڏي. وزيراعظم کي ٻڌايو ويو ته اسلام آباد جي ڳوٺاڻي علائقن جي ترقي جي لاءِ سي ڊي اي 10 ارب رپين جي رقم رکي آهي جنهن سان سالڊ ويسٽ مئنيجمينٽ، سيوريج جو نظام ۽ رستن جي تعمير ۽ بحالي ۽ پبلڪ ٽرانسپورٽ جون اسڪيمون مڪمل ڪيون وينديون. اجلاس کي بهاره ڪهو باءِ پاس، سيونٿ ايونيو انٽرچينج، مارگلا اوينيو، 11 ايوينيو، آءِ جي پي روڊ، اسلام آباد ايڪسپريس وي ۽ پارڪنگ پلازه جي جاري منصوبن جي حوالي سان تفصيلي طور تي آگاهه ڪيو ويو. اجلاس کي ٻڌايو ويو ته بهاره ڪهو باءِ پاس تي 24 ڪلاڪ ڪم جاري آهي. وزيراعظم بهاره ڪهو باءِ پاس کي جلد کان جلد مڪمل ڪرڻ جي هدايت ڪئي. وزيراعظم چيو ته بهاره ڪهو باءِ پاس عوامي نوعيت جو اهم منصوبو آهي جنهن جي تعمير ۾ ڪنهن به قسم جو تعطل قبول نه ڪيو ويندو. اجلاس کي ٻڌايو ويو ته سيونٿ ايونيو انٽرچينج ۽ مارگلا ايونيو منصوبا مڪمل ٿي چڪا آهن. آءِ جي پي روڊ جو توسيعي منصوبو 23 مارچ تائين مڪمل ڪيو ويندو. اليونٿ ايونيو ۽ اسلام آباد ايڪسپريس وي جو فيز ون هلندڙ سال جي وچ ڌاري جڏهن ته بليو ايريا پارڪنگ پلازه ۽ ايڪسپريس وي جو فيز ٽو هلندڙ سال جي پڄاڻي تائين مڪمل ڪيا ويندا. اجلاس ۾ سي ڊي اي چيئرمين پاران ٽرانسپورٽ جي فيڊر روٽس ۽ بس ٽرمينل جي حوالي سان پڻ بريفنگ ڏني وئي. اجلاس کي ٻڌايو ويو ته سي ڊي اي پاران عالمي معيار جو هڪ نيشنل بس ٽرمينل ۽ 3 سيٽلائيٽ ٽرمينل ٺاهيا ويندا جنهن ۾ نجي شعبي جي سيڙپڪاري ٿيندي. ان کانسواءِ 90 ڏينهن ۾ بسن جا 13 فيڊر روٽس شروع ڪيا پيا وڃن جڏهن ته چار فيڊر روٽس هن وقت ڪم ڪري رهيا آهن. اسلام آباد جي پبلڪ ٽرانسپورٽ سسٽم جي ذريعي روزاني جي بنياد تي 2 لک جي لڳ ڀڳ ماڻهو معياري سفري سهولتن مان فائدو کڻي رهيا آهن. وزيراعظم کي اسلام آباد ۾ پارڪنگ جي مسئلن جي حل لاءِ سي ڊي اي جي قدمن کان آگاهه ڪيو ويو. وڌيڪ اهو ته سي ڊي اي ايف ايٽ، ايف ٽين، جي نائن، آئي ايٽ ۽ بليو ايريا ۾ پارڪنگ پلازه ٺاهي رهي آهي. 5000 گاڏين جي پارڪنگ جي صلاحيت سان اهو پارڪنگ پلازه شهر ۾ پارڪنگ جي مسئلي کي حل ڪرڻ ۾ اهم ڪردار ادا ڪندو. سي ڊي اي چيئرمين سمنڊپار پاڪستانين جي لاءِ رهائشي منصوبن تي پڻ تفصيلي بريفنگ ڏني. وزيراعظم هدايت ڪئي ته انهن منصوبن کي عالمي معيار تي آڻڻ جي لاءِ انهن ۾ بهترين سهولتون ميسر ڪيون وڃن. وزيراعظم چيو ته سمنڊ پار پاڪستاني اسان جو قيمتي اثاثو آهن، انهن منصوبن ۾ سيڙپڪاري جي لاءِ نظام کي شفاف ۽ خودڪار بڻايو وڃي. منصوبن جي راهه ۾ ڪنهن به قسم جي رڪاوٽ يا تعطل قبول نه ڪيو ويندو. اجلاس ۾ وفاقي وزيرن اسحاق ڊار، راڻا ثناءُ الله، وزيراعظم جي صلاحڪار احد چيما، خاص معاون طارق باجوه، اڳوڻي وفاقي وزير طارق فضل چوڌري، اسيمبلي جي اڳوڻي ميمبرن حنيف عباسي، انجم عقيل ۽ لاڳاپيل اعليٰ عملدارن شرڪت ڪئي.
