اسلام آباد – 01 – آگسٽ (اي پي پي) پاڪستان منرلز سمٽ ٽن ”مفاهمتي ياداشتن“ تي صحيحن سان پڄاڻي تي پهچي وئي. ان ۾ پاڪستان جي کاڻين جي کوٽائي جي صنعت ۾ پرڏيهي سيرپڪاري جي موقعن جي خاطري ڪرائي وئي آهي. وزيراعظم آفيس جي ميڊيا ونگ پاران جاري بيان موجب پاڪستان منرلز سمٽ – ڊسٽ ٽو ڊيولپمينٽ مقامي هوٽل ۾ منعقد ٿي. وزيراعظم محمد شهباز شريف ان موقعي خاص مهمان هو جڏهن ته آرمي چيف جنرل سيد عاصم منير خصوصي طور شرڪت ڪئي. سمٽ ۾ لاڳاپيل وفاقي ۽ صوبائي وزيرن، پرڏيهي معززين، سيڙپڪارن ۽ فني ماهرن پڻ شرڪت ڪئي. ان سمٽ جو اهتمام اسپيشل انويسٽمينٽ فيسلي ٽيشن ڪائونسل (ايس آئي ايف سي) ۽ بارڪ گولڊ ڪارپوريشن گڏيل طور تي ڪيو هو جنهن کي پيٽروليم واري وزارت سهولت فراهم ڪئي هئي. اها سمٽ ”ڊسٽ ٽو ڊيولپمينٽ: پاڪستان ۾ سيڙپڪاري جا موقعا“ جي موضوع تي هئي. سمٽ کي 4 سيشنز ۾ ورهايو ويو هو جنهن ۾ چار انفرادي خطاب، چار پينل بحث، هڪ اهم تقرير ۽ وزيراعظم محمد شهباز شريف ۽ آرمي چيف جنرل سيد عاصم منير جو خصوصي خطاب شامل هو. سمٽ ماهرن، صنعتي اڳواڻن ۽ سرڪاري ۽ نجي ادارن جي ڪيترين ئي ڌرين کي هڪ پليٽ فارم تي آڻڻ ۽ پاڪستان جي معدنيات جي صلاحيت کي ڳولڻ جي لاءِ اڳتي وڌڻ جو بهترين رستو ڳولڻ ۾ ڪامياب رهي. وزيراعظم ان موقعي تي خطاب ڪندي چيو ته بحيثيت قوم پاڪستانين سدائين عزم ۽ اميد جو مظاهرو ڪيو آهي ۽ اهڙن قدمن سان آئون اميد کي حقيقت بڻجندي ڏسي سگهان ٿو، اسان کي بهتر مستقبل جي لاءِ هڪ مضبوط بيانيو تيار ڪرڻ جي ضرورت آهي ۽ پاڪستان جي معدني دولت اسان جي لاءِ عالمي معيشت ۾ پنهنجي سڃاڻپ بڻائڻ جو بهترين موقعو آهي، ايس آئي ايف سي هڪ بهترين قدم آهي جيڪو پاڪستان کي سڌوسنئون پرڏيهي سيڙپڪاري جي موقعن کي بهتر بڻائڻ ۾ مدد ڪري سگهي ٿو. چيف آف آرمي اسٽاف جنرل سيد عاصم منير پاڪستان ۾ کاڻين جي کوٽائي جي صنعت جي بدلجندڙ منظرنامي بابت پنهنجي ويزن کان آگاهه ڪيو ۽ ايس آئي ايف سي جي اهم ڪردار تي زور ڏنو. هن چيو ته مشڪل وقت ڪنهن قوم جي عزم جو امتحان هوندو آهي، هم آهنگي، ثابت قدمي ۽ اميد جي ذريعي اسان موجوده چئلينجن تي ضابطو آڻي وٺنداسين. تقريب جي پڄاڻي ٽن ”مفاهمتي ياداشتن“ تي صحيحن سان ٿي جنهن ۾ پاڪستان جي کاڻين جي کوٽائي جي صنعت ۾ پرڏيهي سيڙپڪاري جي موقعن جي خاطري ڪرائي وئي.
