اسلام آباد – 17 – مئي (اي پي پي) وزيراعظم محمد شهباز شريف چيو آهي ته 9 مئي تي رياست، ان جي علامتن ۽ حساس جاين تي ٿيندڙ شرپسندن جي حملن جي پاڙ عمران نيازي جي گذريل هڪ سال دوران ڪيل تقريرن جي نقطن ۾ لڪل آهي. پنهنجي ٽوئيٽ ۾ هن چيو ته عمران نيازي پنهنجي سياسي تحريڪ کي حق ۽ باطل جي وچ ۾ جنگ قرار ڏيڻ جي لاءِ آزاداڻي طور تي مذهبي تصويرڪشي ڪئي آهي، هن مسلسل هٿياربند فوج ۽ موجوده آرمي چيف کي بدنام ڪيو، ان تي حملي آور ٿيو ۽ چالاڪي سان حقيقي آزادي جي نعرن سان پنهنجو گروهه تيار ڪيو جنهن جو مقصد انهن کي تشدد تي اتساهڻ هو، جنهن جو اسان 9 مئي تي مشاهدو ڪيو. هن چيو ته عمران نيازي جون تقريرون ٻڌو ته توهان کي پنهنجو جواب ملي ويندو.
